Kancelari gjerman, Friedrich Merz deklaroi të enjten se Kievi dhe aleatët evropianë kanë hartuar një propozim të ri paqeje për Ukrainën, i cili trajton çështjet territoriale dhe i cili pritet të diskutohet me amerikanët gjatë fundjavës.
Gjatë një konference për shtyp në Berlin, Merz bëri të ditur se ai, Presidenti francez Emmanuel Macron dhe Kryeministri britanik, Keir Starmer kanë diskutuar për këtë propozim të ri paqësor me Presidentin e SHBA-së, Donald Trump, në një bisedë telefonike të mërkurën.
“Çështja kryesore këtu është se çfarë lëshimesh territoriale është e gatshme të bëjë Ukraina. Megjithatë, kjo është një pyetje që duhet t’i përgjigjet kryesisht presidenti ukrainas dhe populli ukrainas, siç ia bëmë të qartë edhe Presidentit Trump”, u shpreh Merz, citon Anadolu.
Ai njoftoi se nëse procesi shkon ashtu si pritet, do të ketë bisedime me Shtetet e Bashkuara gjatë fundjavës, dhe më pas në Berlin. Por që kjo varet nga hartimi i përbashkët i dokumenteve.
