Sulmuesi i Fushë Kosovës, Alden Skriejlj është shpallur futbollisti më i mirë i xhiros së 25-t të Superligës së Kosovës në futboll.
Federata e Futbollit të Kosovës (FFK), ka njoftuar të premten se Skriejlj e ka fituar epitetin “Lojtari i Javës”, çmim ky që i jepet futbollistit më të mirë pas përfundimit të secilës xhiro. Zgjedhjen e më të mirit e ka bërë një komision i veteranëve të futbollit, i cili ka vlerësuar se futbollisti nga Mali i Zi ishte më i dalluari.
Në fakt, Skriejlj ishte më i merituari për fitoren e Fushë Kosovës ndaj Ballkanit. Ai shënoi të dy golat në fitoren 2:0 të Fushë Kosvës, ekip që po lufton për mbijetesë. Për 23-vjeçarin, ky është çmimi i parë këtë edicion për lojtarin më të mirë të xhiros.
“Jam i lumtur dhe do të thotë shumë për mua që mora këtë çmim. Do të doja të falënderoja të gjithë, nga shokët e skuadrës deri tek trajneri. Shpresoj që të ketë më shumë çmime të tilla dhe mbi të gjitha të vazhdojmë me rezultate të mira si skuadër”, tha Skrijelj për faqen zyrtare te FFK-së.
