Carlos Alcaraz dhe Jannik Sinner do të përballen të dielën në finalen e US Open 2025, duke e çuar në një tjetër nivel rivalitetin e tyre që tashmë shihet si më i madhi i dekadës.
Spanjolli tregoi edhe një herë pse konsiderohet pasardhësi natyral i epokës Rafael Nadal, duke mposhtur bindshëm Novak Djokovic me rezultatin 6–4, 7–6, 6–2.
Nga ana tjetër, numri një i botës Jannik Sinner pati një betejë më të vështirë kundër kanadezit Felix Auger-Aliassime, por arriti të fitojë 3–1 në sete.
Kjo do të jetë finalja e tretë radhazi e një Grand Slam mes Sinner dhe Alcaraz. Në Roland Garros fitoi Alcaraz, ndërsa në Wimbledon Sinner arriti të marrë revanshin.
Tani, në Flushing Meadows, të dy do të luftojnë jo vetëm për trofeun e US Open, por edhe për vendin e parë në renditjen botërore, që aktualisht mbahet nga italiani.
Rivaliteti mes dy yjeve të rinj, vetëm 22 dhe 24 vjeç, po krahasohet tashmë me duelet legjendare Federer–Nadal.
Çdo ndeshje e tyre është shndërruar në spektakël, me ritëm të lartë dhe goditje të fuqishme, duke bërë që bota e sportit ta shohë këtë përballje si fillimin e një epoke të artë të re në tenis.
Finalja mes Alcaraz dhe Sinner do të zhvillohet të dielën në mbrëmje me fillim nga ora 20:00 me kohën tone lokale.
