I pyetur nga gazetarët, Kurti këto komente i bëri pas disa deklarimeve të presidentit serb, Aleksandër Vuçiq, i cili kishte thënë se Prishtina po pretendon vrasjen e serbëve të Veriut të Kosovës.
“Në Serbi keni një president të frikës. Kur ata flasin për dhunë flasin për vete, për imagjinatën dhe nuk flasin për Republikën tonë, për ne flet Qeveria e Kosovës dhe institucionet e vendit”, deklaroi ndër të tjera Kurti.
Kryeministri Kurti tha se dita e 1 gushtit do të shkonte tërësisht paqësore, nëse më 31 nuk do të vendoseshin barrikadat nga bandat kriminale serbe në veri të vendit.
“Por me 31 korrik u ngritën ato barrikada prej njerëzve që kishin nxitur strukturat kriminale nëpër rrugët në veri të Kosovës. Pra, kur ata flasin për dhunë nuk janë duke folur për neve por për vete. Ne jemi për paqe dhe siguri afatgjate, të mbrojmë demokracinë, kushtetutshmërinë dhe kurrë nuk bënë ta harrojmë progresin”, shtoi Kurti.