Albert Zogaj është zgjedhur edhe për një mandat në krye të Këshillit Gjyqësor të Kosovës (KGJK).
Zogaj u zgjodh në këtë pozitë, në takimin e 328-të të Këshillit, të enjten, dhe ishte kandidati i vetëm që i hyri kësaj gare, raporton “Betimi për Drejtësi“.
Për pozitën e kryesuesit, Zogaj u votua pro unanimisht nga 10 anëtarët e Këshillit që ishin prezent në votim.
Mandati i tij i ri në krye të KGJK-së fillon më 7 korrik 2024 deri në përfundim të mandatit të tij si anëtar i Këshillit.
Zogaj tha se tri shtyllat për mandatin e ardhshëm do të jenë: efikasiteti, cilësia e vendimmarrjes dhe besimi i publikut.
“Do të synoj që të kemi një gjyqësor transparent, të pavarur, ndërtim të besimit të publikut në gjyqësor, partneritetin me institucionet vendore dhe ndërkombëtare”, tha Zogaj.
Gjithashtu, ai tha se në mandatin e tij paraprak si kryesues së bashku më anëtarët e KGJK-së kanë arritur të rekrutojnë 124 gjyqtarë të rinj, 204 bashkëpunëtorë profesional, 127 zyrtarë ligjorë dhe 104 pozita tjera brenda për brenda gjyqësorit.
Komisioni i ngarkuar për procesin e përzgjedhjen së kryesuesit fillimisht sqaroi se Zogaj ka plotësuar kushtet pasi që ka marrë tri nënshkrimet e nevojshme nga anëtarët e KGJK-së, konkretisht nga Teuta Ibrahimi, Drita Rexha dhe Arjeta Sadiku që të jetë kandidat për kryesues.
