Një alarm për bombë në një shkollë ka vënë në gatishmëri policinë e kryeqytetit pasditen e së premtes.
Sipas raporteve paraprake, kërcënimi për bombë është dërguar me email, duke detyruar mësuesit të evakuojnë nxënësit.
Në mesazhin e shkruar në anglisht thuhej se në ambientet e shkollës ishte vendosur një bombë, e cila do të shpërthente për 43 minuta.
Shërbimet e policisë dhe Njësia Antieksploziv kanë shkuar menjëherë në vendngjarje ku kanë evakuuar nxënësit dhe stafin e shkollës.
Ndërkohë, shërbimet e Policisë, strukturat e Antiterrorit në bashkëpunim me specialistë të Hetimit të Krimit Kibernetik po punojnë për zbardhjen e rrethanave dhe identifikimin e dërguesve të këtij e-maili kërcënues drejtuar shkollës.
Në lidhje me këtë kërcënim nga zyrtarët e shkollës është dërguar edhe një mesazh për prindërit.
“Ju informojmë se në shkollë është dërguar një email dhe nxënësit duhet të nisen për në shtëpi. Ne po bashkëpunojmë me policinë. Nuk ka panik dhe të gjithë fëmijët janë shumë mirë! Fëmijët do të transportohen me furgon ose nga prindërit nëse është e mundur. Do të qëndrojmë në kontakt.”/A2CNN
