Gjykata Kushtetuese e Kosovës, në aktgjykimin e saj e tha fjalën përfundimtare.
Zgjedhja e deputetit serb, Nenad Rashiq si nënkryetar i Kuvendit të Kosovës nuk është në përputhje me ligjin.
Kushtetuesja në aktgjykimin 34 faqesh ka treguar që kjo pozitë i takon partisë serbe që e ka shumicën.
Në këtë rast, në Kosovë partia më e madhe serbe me përfaqësim në Kuvend është Lista Serbe.
Ish kryetari i Gjykatës së Apelit, Hasan Shala thotë se veprimi i njëjtë nuk duhet të përsëritet në konstituimin e Kuvendit këtë vit.
Sipas Shalës këtë herë është e përfshirë edhe çështja e Presidentit dhe mund të kemi kolaps institucional.
“Sigurisht që këta janë të obliguar me vepru konform vendimit të Gjykatës Kushtetuese dhe nuk guxojnë me e shkel, mirëpo këta tash i kanë do probleme krejt të tjera që mundohen me i nxjerr për shkak të rastit siç thashë me KQZ-në dhe aty ngadalësohet procedura, por afatet janë me ditë të numëruara deri më 5 mars kemi një presidente dhe më s’kemi, nuk kemi Kuvend dhe nuk kemi Qeveri dhe faktikisht vendi shkon në kolaps, prandaj duhet të ketë shumë kujdes dhe ish dashtë shumë shpejt me punu për të konstituuar Parlamentin dhe me formu Qeverinë dhe atëherë me dalë të çështja e presidentes”, ka thënë Shala.
Për avokatin Arbër Jashari këtë herë duhet të votohet kandidati i shumicës.
Por sipas tij, kjo nuk arrihet vetëm me votat e partive opozitare.
“Nëse vazhdohet me skenarë të njëjtë atëherë Kuvendi nuk do të quhet i konstituuar dhe nëse vazhdojmë prapë me quajt të konstituuar me zgjedhjen e Nenad Rashiqit për nënkryetar sërish do të vijmë në një situatë ku legjitimiteti i Kuvendit do të vihet në pikëpyetje, me ndonjë aktgjykim tjetër të Gjykatës Kushtetuese dhe kjo i bën shumë dëm demokracisë”, është shprehur Jashari.
Këtë ankesë në Gjykatën Kushtetuese e kanë dërguar deputetët e Listës Serbe.
