Kushtetuesja vendosi që pa u zgjidhur nënkryetari nga komuniteti serb nuk konstituohet kuvendi i Kosovës.
Për këtë vendim që nxori organi më i lartë kushtetues në shtet foli të enjten kryeministri në detyrë, Albin Kurti.
Ai tha që po e presin aktgjykimin e plotë megjithëse theksoi që askush nuk po e zë karrigen e nënkryetarit serb.
Madje kreu i qeverisë në detyrë, tha që puna duhet të vazhdoj pasi shteti nuk ka kohë për të humbur.
“Sa i përket aktgjykimit të Gjykatës Kushtetuese, ne duhet ta shohim atë në mënyrë të plotë për të dhënë vlerësimin tonë, por ajo që mund të them tani është se konsideroj që është humbje kohe dhe dëm që nuk po funksionon Kuvendi i Republikës së Kosovës. Kuvendi i Republikës e ka zgjedhë kryetarin Dimal Bashën, i ka zgjedhë katër nënkryetarët Albulena Haxhiun, Vlora Citakun, Kujtim Shalën dhe Emilja Rexhepin askush nuk është duke e zënë karrigen e zbrazët për nënkryetarin nga radhët e komunitetit serb. Është dashur të vazhdoj puna e Kuvendit sepse shteti i Kosovës nuk ka kohë për të humbur”, ka thënë Kurti.
E kryeministri në detyrë, Albin Kurti e sheh si të pamundur kthimin në votim në pako për nënkryetaret nga komunitetet.
“Emilja Rexhepi është nënkryetare e Kuvendit të Republikës së Kosovës, nuk mundet votimi për Emilja Rexhepin të anulohet, prandaj ne kemi ngelur te nënkryetari i fundit nga komuniteti serb por mos harroni nuk janë serb vetëm ata të Listës Serbe, serb është edhe Nenad Rashiq. Në njërën anë përfaqësuesi i Listës Serbe i mori veç 10 vota, a Nenad Rashiq i mori 56, veç 5 vota të ia jepshin këta 52 që janë të opozitës sot nuk ishim duke i bërë këto pytje dhe këto përgjigje”, është shprehur tutje Kurti.
Më 26 gusht, ligjvënësit e zgjodhën kryetar të Kuvendit të Kosovës, Dimal Bashën.
Në të njëjtën ditë, për pozitën e nënkryetarëve u votuan Albulena Haxhiu nga Vetëvendosje, Vlora Citaku nga Partia Demokratike e Kosovës, Kujtim Shala nga Lidhja Demokratike e Kosovës dhe Emilja Rexhepi nga komunitetet jo shumicë.
Basha e pati shpallur të konstituuar legjislaturën e nëntë ani pse dështoi votimi për një nënkryetar nga komuniteti serb.
Por, Gjykata Kushtetuese ka konstatuar që seanca konstituive nuk ka përfunduar.
