Prokuroria Themelore në Prizren ka ngritur aktakuzë ndaj tre personave, të cilët dyshohen për përfshirje në veprime të paligjshme që lidhen me lëshimin e certifikatave mjekësore dhe dokumenteve të falsifikuara për kandidatë që synonin të merrnin patentë-shoferin.
Sipas aktakuzës, i pandehuri L.B., drejtor i poliklinikës “G.” në Prizren dhe person i licencuar nga Ministria e Shëndetësisë, dyshohet se më 15 korrik 2023 ka lëshuar certifikata mjekësore të rreme për dy kandidatë — B.V. dhe B.Th., pa kryer kontrollat e nevojshme mjekësore dhe pa qenë këta persona fizikisht të pranishëm në Kosovë.
Hetimet kanë vërtetuar se në momentin e lëshimit të certifikatave, kandidatët ndodheshin jashtë vendit, ndërsa dokumentet e falsifikuara janë përdorur për regjistrimin e tyre në autoshkollat “S.” në Prizren dhe “F.” në Malishevë, duke u mundësuar pjesëmarrjen në procesin e marrjes së patentës së shoferit.
Sipas Prokurorisë, U.M. dhe I.G., përfaqësues të këtyre autoshkollave, kanë hartuar dhe dorëzuar dokumente të rreme – përfshirë kontrata dhe dëshmi për pjesëmarrje në ligjërata – për kandidatët që nuk ndodheshin në territorin e Kosovës.
Të dy këta persona akuzohen për veprën penale “Legalizimi i përmbajtjes së rreme”, ndërsa drejtori i poliklinikës L.B. për “Keqpërdorim të pozitës apo autoritetit zyrtar”.
Në përfundim të hetimeve, Prokuroria Themelore në Prizren ka propozuar që pas zhvillimit të shqyrtimit gjyqësor dhe administrimit të provave, të pandehurit të shpallen fajtorë dhe të dënohen sipas ligjit në fuqi.
