Prokuroria Themelore në Prizren ka ngritur aktakuzë kundër tetë personave të dyshuar për përfshirje në një rast të keqpërdorimit të pozitës apo autoritetit zyrtar dhe mashtrimit në prokurim publik, në lidhje me tenderin për “Renovim dhe mirëmbajtje të objekteve të Komunës së Prizrenit”.
Në njoftim bëhet e ditur se aktakuza është ngritur kundër të pandehurve Xh.D., Y.G., Q.K., S.V., E.Sh., L.S. dhe B.J., për veprën penale “Keqpërdorimi i pozitës apo autoritetit zyrtar”, si dhe ndaj të pandehurit D.N., për veprën penale “Keqpërdorimi apo mashtrimi në prokurim publik”.
Sipas aktakuzës, më katër gusht 2022, në Prizren, të akuzuarit në cilësinë e personave zyrtarë për vlerësimin e ofertave në një tender publik, kanë shkelur Ligjin për Prokurim Publik dhe udhëzimet përkatëse, duke i dhënë përparësi të padrejtë grupit të operatorëve ekonomikë “P.C.G. Sh.P.K.” dhe “A.-T. Sh.P.K.” përkundër ofertuesve më të lirë, duke shkaktuar kështu dëm buxhetit komunal në vlerë prej 412,584.87 euro.
“Xh.D. (kryetar i komisionit), Y.G. dhe Q.K. (anëtarë): Rekomanduan lidhjen e kontratës në vlerë 550,000 euro, përkundër pesë operatorëve tjerë me oferta më të ulëta me rreth 203%. S.V. (menaxher i kontratës), L.S. (mbikëqyrëse e brendshme), B.J. (mbikëqyrës i jashtëm): Nuk ndërmorën veprime për të parandaluar dëmin dhe nuk vepruan sipas detyrave ligjore. E.Sh. (drejtor i administratës): Dyshohet se ka ndikuar në manipulimin e çmimeve të ofertave. D.N. (përfaqësues i kompanisë “A.T. Sh.P.K.”): Dyshohet për dorëzim të dokumentacionit të rremë dhe manipulim me çmime jo reale për të fituar tenderin – përfshirë çmime spekuluese dhe pozicione që nuk janë realizuar”, thuhet në aktakuzë.
Prokuroria ka propozuar që pas mbajtjes së shqyrtimit gjyqësor dhe administrimit të provave, të gjithë të pandehurit të shpallen fajtorë dhe të dënohen sipas ligjit.
