Në muajin gusht, nga Gjykata u nxor me pranga në duar.
Është ky Ramadan Morina, nga Astrazubi i Malishevës.
Ky i fundit, po dyshohet se në vitin 1999, mori pjesë në vrasjen e 34 bashkëkombasve të vet.
E gjithë ngjarja kishte ndodhur në këtë vend, në atë që njihet si masakra e Burimit në Malishevë.
E të enjten, Prokuroria Speciale e Republikës së Kosovës, ndaj Morinës, ka ngritur aktakuzë për krime lufte.
“Prokuroria Speciale e Republikës së Kosovës ka ngritur aktakuzë ndaj të pandehurit R.M., nën dyshimin për kryerjen e veprës penale “Krim i luftës kundër popullsisë civile”. Sipas aktakuzës, më 31 mars 1999, në fshatin Burim të Komunës së Malishevës, R.M., në bashkëkryerje me pjesëtarë të tjerë të forcave policore dhe ushtarake serbe, ka marrë pjesë në vrasjen e 34 civilëve shqiptarë”, thuhet në njoftimin e PSRK-së.
Shqiptari, po dyshohet edhe për plaçkitje e pjesëmarrje në dëbimin e popullsisë civile.
“R.M., akuzohet edhe për pjesëmarrje në shkatërrimin e pronës, dëbim masiv të popullsisë civile dhe plaçkitjen e pasurisë së rreth 1.000 qytetarëve, të cilët nuk ishin të përfshirë në luftë. I pandehuri ndodhet nën masën e paraburgimit deri në një vendim tjetër të gjykatës, ndërsa rasti i është kaluar për trajtim Departamentit Special të Gjykatës Themelore në Prishtinë”, ka thënë tuje PSRK-ja.
Në fund, PSRK thotë se mbetet e përkushtuar në ndjekjen penale të krimeve të kryera gjatë luftës në Kosovë.
Ndryshe, Ramadan Morina ka vendbanim të përhershëm në Serbi.
Por arrestimi i tij ishte bërë në rrugën “Muharrem Fejza” në Prishtinë, në gusht të këtij viti, kur erdhi për ta vizituar një familjare.
