Prokuroria Speciale e Republikës së Kosovës, ka ngritur aktakuzë ndaj L.D, për veprën penale “Sulmi ndaj personit zyrtar”.
Sipas Prokurorisë ai akuzohet se më 29 maj të vitit të kaluar ka marrë pjesë në sulmin ndaj ushtarëve të KFOR-it dhe Policisë së Kosovës.
“Sipas aktakuzës i pandehuri më datë 29.05.2023, afër objektit të Komunës së Zveçanit, në koordinim me të pandehur të tjerë të nacionalitetit serb nga Kosova dhe Serbia, përmes përdorimit të dhunës i kanë sulmuar dhe seriozisht i kanë kanosur ushtarët e misionit paqeruajtës të KFOR-it, si dhe disa pjesëtarë të Policisë së Kosovës”, thuhet në komunikatë.
Prokurori i Shtetit nga Prokuroria Speciale ka kërkuar nga Gjykata që të pandehurin ta shpallë fajtor dhe të njëjtit t’i vazhdohet masa e paraburgimit deri në përfundim të këtij rasti penal.
