Ndihmësdrejtori i ashtuquajturës Zyrë për Kosovë në Qeverinë e Serbisë, Igor Popoviq, ka pranuar fajësinë për veprën penale “nxitje të përçarjes dhe mosdurimit”.
Popoviq akuzohet se me dashje dhe me qëllim ka nxitur dhe përhapur publikisht urrejtje dhe mosdurim ndërmjet grupeve etnike.
Prokuroria Speciale ka njoftuar se ka ngritur aktakuzë ndaj tij.
Sipas aktakuzës, Popoviq ka mbajtur një fjalim publik, me të cilin i është drejtuar një mase të gjerë qytetarësh, ku ndër të tjera ka përdorur gjuhë me përmbajtje nxitëse dhe urrejtëse, duke thënë: “…Serbët kanë pësuar këtu në rajonin e Rahovecit, Metohisë, Kosovës e Metohisë, për shkak se janë vendas dhe i kanë rrënjët këtu dhe nuk lejojnë që dikush t’i shpallë okupatorë, ardhacakë dhe t’i përzë nga këtu, nga UÇK – organizatë terroriste”, dhe më pas ka vazhduar të bëjë thirrje drejtuar qytetarëve, duke deklaruar: “Neve na mbetet të jemi krenarë për trimërinë e viktimave dhe vëllezërve të mbetur këtu dhe të mëtojmë që Hoça e Madhe dhe Rahoveci të mbeten serbe…” .
Popoviqi ishte arrestuar më 19 korrik në pikën kufitare me Serbinë, Bërnjak. Një ditë para arrestimit, më 18 korrik në fshatin Hoçë të Madhe të Rahovecit, gjatë një fjalimi me serbët lokalë, ai e ka quajtur UÇK-në organizatë terroriste.
