Prokuroria Themelore në Pejë, në bashkëpunim me Policinë e Kosovës dhe Inspektoratin e Punës, ka zhvilluar sot një aksion të gjerë në 20 lokacione në Pejë, Klinë, Istog dhe Deçan, duke kontrolluar sigurinë e punëtorëve në punimet e banesave kolektive.
Aksioni, i udhëhequr nga kryeprokurorja Lumturije Vuçetaj me mbështetjen e 9 prokurorëve dhe 60 policëve, ka zbuluar parregullsi serioze në të gjitha vendpunimet e kontrolluara.
Si rezultat, janë mbyllur 7 prej tyre – dy në Pejë, tre në Istog, një në Klinë dhe një në Deçan – ndërsa personat përgjegjës të kompanive janë shoqëruar në polici.
Prokuroria ka konfirmuar se në disa raste janë iniciuar procedura për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, sipas Kodit Penal të Kosovës.
Në periudhën janar–qershor 2025, vetëm në rajonin e Pejës janë regjistruar 19 raste të kësaj natyre, ku fatkeqësisht 3 punëtorë kanë humbur jetën dhe 16 të tjerë janë lënduar rëndë.
Prokuroria e Pejës ka bërë thirrje që qytetarët të raportojnë rastet ku rrezikohet siguria në vendin e punës, në mënyrë që shkelësit të ndiqen penalisht dhe të dalin para drejtësisë.
