Spitali i Përgjithshëm i Pejës ka njoftuar se të enjten gjatë transferimit të një pacienti për në QKUK, ekipi mjekësor i tyre është përfshirë në një aksident trafiku.
Si pasojë e këtij aksidenti, mjeku i këtij spitali ka pësuar frakturë në dorë dhe po trajtohet në QKUK, kurse infermieria dhe shoferi kanë marrë lëndime më të lehta.
Ndërsa, sipas njoftimit të spitalit, pacienti nuk ka pësuar lëndime.
“Pacienti është transferuar me sukses për në QKUK pas intervenimit të shpejtë nga një ekip tjetër me një autoambulancë tjetër të Spitalit tonë. Spitali i Përgjithshëm në Pejë u uron shërim të shpejtë Mjekut tonë dhe gjithë të lënduarve në këtë aksident dhe shpreh mirënjohje për përkushtimin e personelit tonë shëndetësor, të cilët edhe në situata të tilla vazhdojnë të shërbejnë pacientëve me përgjegjësi dhe profesionalizëm”, thuhet në njoftimin e spitalit./teve1.info/
