Një aksident i rëndë trafiku ka ndodhur sot në magjistralen Pejë–Prishtinë, në fshatin Dollc të Klinës, ku një i ri 23-vjeçar ka humbur jetën, ndërsa pesë persona të tjerë kanë mbetur të lënduar.
Sipas Policisë së Kosovës, në aksident ishin të përfshira një veturë dhe një autobus. Shoferi i veturës, për shkak të lëndimeve të rënda, ka ndërruar jetë në vendin e ngjarjes, ndërsa pesë pasagjerë të tjerë janë dërguar për trajtim në Spitalin e Përgjithshëm në Pejë.
Nga spitali është njoftuar se katër nga të lënduarit tashmë janë liruar në gjendje stabile shëndetësore, ndërsa një tjetër po vazhdon trajtimin në repartin e Kirurgjisë dhe ndodhet jashtë rrezikut për jetë.
“Nga pesë pacientët e pranuar pas aksidentit trafiku në fshatin Dollc të Klinës, katër kanë marrë trajtimin e nevojshëm dhe janë lëshuar në gjendje stabile shëndetësore. Një pacient tjetër vazhdon të trajtohet në repartin e Kirurgjisë, ku është nën kujdesin e ekipeve tona mjekësore dhe është jashtë rrezikut për jetë”, thuhet në njoftimin e Spitalit të Përgjithshëm në Pejë.
Me urdhër të prokurorit të shtetit, trupi i pajetë i viktimës është dërguar në Institutin e Mjekësisë Ligjore në Prishtinë për obduksion, ndërsa policia ka konfirmuar se rasti është duke u hetuar.
