Në një prononcim për teve1.info, drejtori i AKK-së, Yll Buleshkaj ka treguar edhe për periudhën se sa mund të zgjasë ky proces.
“Ne i shikojmë se qysh janë modalitetet për komunikime ndërkombëtare, munden me u vonu më shumë por afati ligjor është 6 muaj maksimumi, në rastin më të keq, por po shpresoj se nuk do të shkojmë kaq shumë”, tha ai.
Tutje, Buleshkaj ka treguar edhe për hapat e mëtutjeshëm që mund të ndërmerren ndaj Berishajt në rast se konstatohet se nuk ka pasur deklarim të pasurisë.
“Ne së pari shohim te qarkullimi që e ka pasur, tash varet kogja shumë nëse e ka një biznes që s’ka gjeneru të hyra hiq atëherë është shkelje e vogël, nëse ka gjeneru të hyra edhe nuk është deklaruar atëherë është për Prokurori rasti, duhet me u procedu në Prokuri vetëm se ne duhet dëshmuar me dokumentacion”, tha ai.
Ambasadori i Kosovës në Zagreb dyshohet se e ka fshehur pronësinë e tij mbi tri kompani në deklarimin e pasurisë që e ka bërë në Agjencinë Kundër Korrupsionit.
Në formularin e pasurisë, ambasadori Berishaj nuk ka deklaruar se është pronar i “MB Consulting”, kompaninë së tij në Mal të Zi, me të cilën implikohet në skandalin financiar për transfere të dyshimta të parave te politikani slloven, Robert Golob.
Në deklarimin e pasurisë në AKK, ambasadori Berishaj u raportua se ka fshehur aksionet të cilat i posedon edhe në dy kompani në Kosovë: Myloja LLC dhe Zaslon Kosova.
Televizioni slloven, Planet TV ka raportuar për një skandal të madh financiar, ku implikohet edhe Berishaj. Sipas televizionit, ambasadori kosovar kishte pranuar në llogarinë e kompanisë së tij “MB Consulting” 600 mijë euro nga dega në Beograd e kompanisë energjetike sllovene, “GEN-I”, e të cilat pretendohet se i ka tërhequr në ‘cash’ dhe më pas ia ka dhënë politikanit slloven, Robert Golob./teve1.info/
