Kuvendi i Kosovës ende është me masë të përkohshme nga Gjykata Kushtetuese.
E nëse ky institucion nuk konstituohet brenda vitet rrezikohet të bllokohet buxheti i shtetit në tërësi.
Drejtori ekzekutiv i Asociacionit të Komunave të Kosovës, Sazan Ibrahimi thotë se afati i fundit për votim të buxhetit është muaji dhjetor.
“Në situatën e tanishme, nëse nuk kemi konstituim të Parlamentit këtë vit atëherë institucionet buxhetore të Republikës së Kosovës do të kenë mjete financiare vetëm për janarin e vitit të ardhshëm dhe në shkurt të vitit të ardhshëm nuk mund të kryhet asnjë pagesë, gjithë administrata do të mbet pa paga dhe në bazë të legjislacionit në fuqi shteti i Kosovës mund të kryej pagesa vetëm për këstin e kredive që ka marrë me institucionet ose organizatat jashtë Republikës së Kosovës dhe nuk mund të bëjë asgjë”, ka thënë Ibrahimi.
Ibrahimi thotë se në rast të zgjedhjeve mund të ketë shtyrje edhe për një muaj.
“Është rasti tjetër, nëse ka zgjedhje të reja parlamentare deri në fund të dhjetorit atëherë situata ndryshon dhe ky problem mund të shtyhet vetëm deri në muajin shkurt, por në mars të kemi situatën e njëjtë”, shprehet ai.
Frikën e një kolapsi në tërësi e ka edhe kryetari i Sindikatës së Punëtorëve të Administratës së Kosovës, Ali Gashi.
Gashi thotë se ka një mundësi përmes ligjit të financave por nuk mjafton.
Sipas Gashit, nga kjo po pësojnë qytetarët dhe jo të zgjedhurit e popullit.
Para votimit të buxhetit në total të Republikës së Kosovës në dhjetor të këtij viti, është miratimi i buxheteve komunale.
Komunat e Kosovës kanë afat deri më 30 shtator të kryejnë këtë obligim ligjor.
