Autori: Jona Kelmendi
Për një situatë, siç e quajtën ata alarmuese, thirrën konferencë për media të hënën.
Aty, Kryetari i Aleancës Kosovare të Bizneseve tha që ndërprerja e energjisë elektrike për qindra biznese ka krijuar një sfidë të rëndë për ekonominë në vend.
Madje Shahini ka paralajmëruar që kompanitë mund të largohen nga Kosova si shkak i rrymës.
“KEDS ka ndërprerë energjinë elektrike për mbi 1,200 njehsorë elektrikë, që përfshijnë përafërsisht mbi 200 kompani, që kanë mbi 10 mijë punëtorë. Aktualisht jan rreth 100 biznese pa energji. Ky veprim ka ndaluar prodhimin, ka krijuar havari në ekonomi, ka shkaktuar stres te madh te punëtorët dhe menaxherët dhe ka dëmtuar rëndë imazhin e Kosovës si vend i sigurt për investime si për investitorët vendorë, ashtu edhe për ata të huaj. Shumë biznese të drejtat e veta i kanë konfirmuar dhe i kanë marr nga arbitrat e ndryshëm ndërkombëtar prandaj në të ardhmen bizneset do të kërkojnë edhe jashtë të drejtën e vetë”, ka thënë Shahini.
Tutje Shahini e ka quajtur të papranueshme përfshirjen e policisë në këtë proces, duke e cilësuar si shkelje të rëndë ligjore.
“Është e papranueshme që një institucion i shtetit, Policia e Kosovës, të përdoret për të asistuar një kompani private kundër kompanive dhe bizneseve të tjera private, pa vendim gjykate. Kjo është një shkelje e rëndë ligjore, një abuzim me autoritetin dhe një goditje direkte ndaj sundimit të ligjit dhe të drejtave të bizneseve”, është shprehur tutje Shahini.
Andaj Menaxherja e AKB-së Lumnije Hajdini tha që qeveria duhet të ndërhyjë urgjentisht me masa lehtësuese për bizneset.
“Të japin një periudhë më të gjatë për kalimin në këtë fushë dhe të zbatohen masa në mënyrë graduale ose të krijojnë mekanizma mbështetës”, ka thënë Hajdini.
E një prej kompanive që ka qenë e obliguar të dal në treg të lirë pas vendimit të ZRRE-së, thotë se janë detyruar ta padisin KEDS-in.
“Ne kompania Solid fabrik e këpucëve në Suharekë për momentin e kemi paditur KEDS-in, lënda eshtë në giykatë, nuk na është kthyer ndonjë përgjigje. Por paraprakisht kemi bërë një kontratë me KEK ku na është kërkuar 15 mijë euro t’i lëmë garancion. Ai garancion nuk ka arsyetim, kurse konkretisht fatura e rrymës që na është dërguar eshtë 2100 euro, më e lartë se në muajt e mëparshëm”, është shprehur Kuqi.
E Oda Ekonomike e Kosovës paralajmëroi se do të dorëzojnë padi në Gjykatën Supreme, duke kundërshtuar vendimin e Zyrës së Rregullatorit për Energji (ZRRE) për shkyçjen e qindra bizneseve – që nuk kanë siguruar marrëveshje me ndonjë furnizues – nga rrjeti elektrik.
Kjo ODË e ka cilësuar vendimin si të padrejtë dhe me pasoja për bizneset dhe konsumatorët.
