Mbrojtësi i Kombëtares së Zvicrës, Manuel Akanji ka paralajmëruar se “helvetikët” synojnë fitore në ndeshjen ndaj Kosovës në kuadër të kualifikimeve për Botërorin 2026.
Akanjani, i cili ditë më parë u huazua tek Interi nga Manchester City, ka insistuar se Zvicrës patjetër i duhen pikët e plota në këtë përballje, duke pasur parasysh se luajnë në Basel.
Zvicra dhe Kosova, do të përballen të premten mbrëma në kuadër të Grupit B kualifikues për Botërorin 2026, të cilin e përbëjnë edhe Suedia e Sllovenia.
Megjithatë, Akanji ka vlerësuar lartë Kosovën por ka shtuar se Zvicra ka për qëllim që këtë cikël eliminator ta nisë me fitore.
“Këtë të premte, ne patjetër që synojmë ta fitojmë ndeshjen dhe jam i bindur se do t’ia dalim mbanë. Mirëpo, Kosova nuk është kundërshtar i lehtë, pasi është e fortë dhe agresive. Ne duhet të jemi gati, pasi e kemi parasysh që gjithçka fillon të premten”, ka thënë Akanji.
Tri ditë pas ndeshjes me Kosovën, Zvicra përballet me Slloveninë sërish në shtëpi, ndërsa “Dardanët” në Prishtinë e presin Suedinë.
