Anëtari i Partisë Demokratike të Kosovës, Driton Ajazi, ka komentuar deklaratat e nënkryetarit Enver Hoxhaj, i cili e kishte cilësuar Konventën e sotme si “jodemokratike” dhe skemë politike.
Ajazi theksoi se Konventa e jashtëzakonshme është mbajtur pikërisht në afatin e përcaktuar nga rregullat statutuare, dhe se këtë, sipas tij, “e di mirë edhe vetë Hoxhaj”.
“Rregullat statusore e parashohin Konventën e jashtëzakonshme brenda një afati, ashtu siç u mbajt. Ka qenë e drejtë e secilit që të shpreh interesimin për kandidim, ashtu siç e parasheh statuti i PDK-së. Koha ishte e shkurtër edhe për Bedri Hamzën, por ai e shpalli kandidaturën menjëherë pas dorëheqjes së Krasniqit”, tha Ajazi në emisionin “Info Nata” në Tëvë1.
Ai u shpreh se Hoxhaj ka të drejtë ta shohë situatën nga këndi i tij politik, por theksoi se procesi ishte brenda rregullave.
“Hoxhaj mund ta shohë si skemë politike. Secili e sheh nga prizmi i tij. Ai ka dhënë kontribut të jashtëzakonshëm për dy dekada në parti, mirëpo jemi në demokraci – secili i ka bindjet e veta”, tha Ajazi.
Ajazi shtoi se, po të ishte një Konventë e rregullt, kandidatët do të kishin një muaj kohë për të dorëzuar platformat e tyre politike. Por, për shkak të zhvillimeve në vend dhe pritjes për zgjedhje të reja, PDK-ja e mbajti Konventën në formë të jashtëzakonshme.
“Kjo është arsyeja pse procesi u zhvillua me këtë ritëm”, përfundoi Ajazi.
Pas dorëheqjes së Memli Krasniqit nga posti i kryetarit të PDK-së, në Konventën e sotme pasardhës i tij u zgjodh Bedri Hamza, me vota absolute dhe asnjë kundër. /teve1.info
