Kryetari i Shoqatës së Prodhuesve të Kosovës, Kushtrim Ajazi, ka reaguar pas vendimit të shkallës së dytë të gjykatës, i cili i jep të drejtë Zyrës së Rregullatorit për Energji (ZRrE). Ai tha se vendimi është i mirëpritur, por bëhet fjalë vetëm për një masë sigurie dhe jo për aktgjykimin përfundimtar.
“Ka qenë një vendim i mirëpritur nga ne, ka qenë një vendim nga gjykata edhe ne nuk i komentojmë vendimet e gjykatës. Ne vazhdojmë tutje me procedura të tjera gjyqësore. Duhet pasur parasysh se është vetëm vendimi për masën e sigurisë, nuk është aktgjykimi i plotë i tërë procesit të daljes në tregun e lirë,” tha Ajazi në emisionin “Ditari” në Tëvë1.
Ai kritikoi faktin se vendimi i ZRrE-së nuk është pezulluar gjatë procesit, duke e konsideruar këtë si një gabim që ka rënduar situatën.
“Në një procedurë të tillë, fatkeqësisht, nuk është pezulluar vendimi nga ZRrE-ja. Nuk është dashtë me ardhë deri në këtë pikë fare, por ne vazhdojmë që të dërgojmë procedura,” u shpreh ai.
Sipas Ajazit, tregu i energjisë po funksionon në kushte të jashtëligjshme dhe kjo do të ketë pasoja të mëdha për bizneset.
“Ne mendojmë se jemi në treg të jashtëligjshëm, sepse bizneset do të dëmtohen jashtëzakonisht shumë. Faturat që kanë pranuar për muajin qershor kanë dalë me 68 ditë vonesë dhe aty kemi parë se çmimi i energjisë elektrike është së paku dyfishi i asaj që kanë paguar gjatë vitit të kaluar. Kostoja e energjisë është shumë e lartë dhe ne nuk kemi ende institucione në vend,” tha Ajazi.
