Ahmeti i ftuar në emisonin “Ditari” në Tëvë1, foli për çështjet e energjisë elektrike në vend, si dhe iniciativat e partive politike për të hetuar menaxhimin e këtij sektori.
Sipas tij, Ambasadori i Kosovës në Kroaci, Martin Berishaj, i cili u akuzua për shpëlarje parash, është funksionues sekser i qeverisë.
“Në fillim është folur për mundësinë e rrëzimit të blloqeve në KEK, ndërkohë që sot e kemi një aferë që po vërtetohet çdo ditë, nga ambasadori, Martin Berishaj, funksionuesi sekser i qeverisë, në ndërkohë që kërkesa e qeverisë për një komision hetimor është kërkesë absurde, për shkak se qeveria i ka të gjithë mekanizmat e duhur në dorën e tyre, pra ka shumë mundësi për të kryer hetimin e keqpërdorimeve eventuale që kanë ndodhur në këto 16 vite. Sepse kërkesa është bërë që nga viti 2006 deri në vitin 2022”, shtoi Ahmeti.
AI më tej ka thënë se kërkesa e pushtetit për formim të këtij komisioni hetimor është absurde, për faktin se qeveria i ka mekanizmat e duhur për të hetuar keqpërdorimet, ndërkohë komisionet hetimore janë mjeti i vetëm i Opozitës për të hetuar raste të tilla.
Kërkesën për komisioni hetimor, Opozita e ka kërkuar më shumë se dy-tre javë, tha Ahmeti.
Teksa shtoi se kjo kërkesë është e drejtë duke marrë parasysh që ka afera më të thella se sa ato që janë dyshuar në fillim.
“Opozita tashmë ka më shumë se dy tre javë që ka kërkuar komisionin hetimor, ku do të hetohet çdo gjë që ka ndodhur në këto muajt e krizës me energji elektrike, dhe vlerësojmë që kjo kërkesë, është kërkesë e drejtë. Pra, çdo gjë që ka ndodhur në këtë periudhë ka nevojë për hetim, sidomos tash kur po shihet që ka afera shumë më të thella se sa ato që janë dyshuar në fillim”, tha tutje ai.
Tutje, Ahmeti përmendi edhe keqpërdorimet që kanë ndodhur gjatë së kaluarës në KEK, ku më pas fajësoi shefen e grupit parlamentar të Vetëvendosjes, Mimoza-Kusari Lila, e cila atë kohë ka qenë ministre dhe pjesë e komisionit ndërministror.
Gjithashtu, tha se nëse ka ndonjë bazë për hetim se kush duhet të hidhet në palën e të akuzuarit, pa dyshim që duhet të jetë Kusari Lila.
“Kur flasim për keqpërdorimet në të kaluarën që kanë ndodhur në KEK, plotësisht flasim për privatizimin e distribucionit të KEK-ut që sot njihet si KEDS, ku ministre dhe pjesë e komisionit ndërministror ka qenë Mimoza-Kusari Lila, e cila sot është shefe e grupit parlamentar të Vetëvendosjes. Pra, nëse ka një bazë për hetim nëse dikush do të hidhet në palën e të akuzuarit, dihet që është shefja e grupit parlamentar të Vetëvendosjes”, u shpreh ai.
