Kushtrim Ahmeti nga Dhoma e Tregtisë dhe Industrisë ka deklaruar se kërkesa e tyre është që të shtyhet iberalizimi i tregut për të paktën një vit, në mënyrë që bizneset të jenë të gatshëm për ta përballuar daljen në treg.
Ahmeti në një intervistë për tëvë1, para fillimit të protestës së bizneseve ndaj vendimit të ZRrE-së për shtrenjtimin e rrymës thotë se disa biznese i kanë mbyllur procesin e punës.
Madje ai ka thënë se KEK-u ka dërguar kontratat për nënshkrim, por nuk ka dërguar çmime se sa do të iu kushtojë bizneseve nëse ato nënshkruajnë marrëveshje me KEK-un.
“Herën e kaluar kur e kemi mbajtur protestën, është kërkesa jonë e vetme që ka qenë nga fillimi deri më tani dmth shtyrja e liberalizimit të tregut edhe për të paktën një vit në mënyrë që të gjitha bizneset së pari edhe vetë sistemi energjetik i vendit të jetë i përgatitur për ta përballuar këtë dalje në treg të këtyre bizneseve. Ka disa biznese që i kanë mbyllur procesin e punës, ka të tjera që po planifikojnë të ulin numrin e punëtorëve, të ndërpresin planifikimet e tyre për investime, janë fatkeqësisht pasojat e para që po i shohim ne nga ky ndërveprim që po ndërmerren. KEK-u ende nuk ka arritur që të qartësojë siç duhet të gjitha të dhënat, aktualisht vetëm i ka dërguar kontratat për nënshkrim, por në anën tjetër nuk ka dërguar asnjë çmimore se sa do të iu kushtojë bizneseve nëse ato do të nënshkruajnë marrëveshje me KEK-un sa i përket furnizimit për dy muaj të këtij viti. Ende bizneset nuk kanë shkruar me asnjë kompani kontrata shkaku se ende nuk ka një qartësim të gjitha detajeve që duhet t`i dërgohet një biznesi”, ka deklaruar ai.
Ndryshe, bizneset në Kosovë kanë nisur protestën e dytë e paralajmëruar kundër vendimit të Zyrës së Rregullatorit për Energji (ZRRE), i cili parasheh daljen e detyrueshme të ndërmarrjeve në tregun e lirë të energjisë./teve1.info/
