Kolorado, bashkë me 14 shtete të tjera, do të votojnë të martën në një garë maratonike që cilësohet si “Super e Marta”.
E ish-ambasadori i Kosovës në Doha – Katar, Amir Ahmeti tha se deri më tani lideri i Partisë Republikane, Donald Trump ka fituar nëntë shtete, derisa kunderkandidatja e tij, Nikki Haley ka fituar vetëm një.
Madje, Ahmeti tha se Trump tashmë do të vërtetohet se ka fituar në të gjitha shtetet sapo të fillojë numërimi i votave.
“Deri tani presidenti Trump ka fituar nëntë shtete ndërsa Haley ka fituar vetëm një, Washington DC i ka fitu të gjitha votat e delegatëve për konventën kombëtare të republikanëve. Definitivisht Trump ka fitu të gjitha shtetet edhe kjo po pritet që të ndodhë në shumicën e shteteve në të cilat ka filluar votimi, sonte vonë kur do të fillojnë të numërohen votat. Unë mendoj se kandidatja Haley do ta vendosë a do të vazhdojë fushatën më tutje, por nuk e besoj se pas gjithë këtyre fitoreve të vazhdueshme të Trump”, tha Ahmeti në emisionin “Këndi i Debatit” në Tëvë1.
Ndryshe, Gjykata Supreme e Shteteve të Bashkuara e ka hedhur poshtë kërkesën e Kolorados për t’ia ndaluar ish-presidentit, Donald Trump, garimin në zgjedhjet primare në këtë shtet.
Kolorado e kishte diskualifikuar Trumpin nga zgjedhjet primare në dhjetor, për shkak të rolit që kishte në trazirat e 6 janarit të vitit 2021, kur mbështetësit e tij sulmuan ndërtesën e Kongresit amerikan.
Gjykata Supreme vendosi të hënën se pushtetin për një vendim të tillë e ka Kongresi dhe jo shtetet.
Vendimi i sotëm nënkupton se Trumpi ka të drejtë të garojë tani në zgjedhjet primare në Kolorado.
“Fitore e madhe për Amerikën”, shkroi Trumpi në rrjetin e vet social menjëherë pas vendimit të Gjykatës Supreme.