Kandidati për kryetar të Junikut nga radhët e Aleancës për Ardhmërinë e Kosovës (AAK), Agron Kuçi, ka deklaruar se është kërcënuar me jetë pas, siç tha ai, “denoncimit publik të skandaleve dhe keqpërdorimeve zgjedhore”.
Përmes një postimi në Facebook, Kuçi njoftoi se rasti tashmë është raportuar në organet kompetente.
“Megjithatë, kërcënime si këto të sotit nuk mund t’i injoroj, prandaj rastin e kam paraqitur në organet kompetente”, ka shkruar ai në Facebook.
Sipas Kuçit, kërcënimet po vijnë pas ekspozimit të, siç i quan ai, manipulimeve me procesin zgjedhor në këtë komunë.
“Ata që mashtruan e shpifën, që blenë vota me shuma të mëdha dhe kontrabanduan votues nga komuna të tjera përmes ndërrimit të vendbanimeve, tani – pasi janë zbuluar dhe ballafaquar me fakte e dëshmi – po përpiqen ta heshtin të vërtetën me kërcënime e presione”, ka shkruar ndër të tjera kandidati i AAK-së.
