Regjisor i mirënjohur kosovar Agon Myftari është bërë pjesë e televizionit TËVË1. Krahas punës profesionale, ai do të jetë i angazhuar edhe në postin e Drejtorit të Programacionit.
Agon Myftari është regjisor i brezit të ri, i diplomuar në Fakultetin e Arteve, drejtimi i Regjisë Teatrore, në Universitetin e Prishtinës në vitin 2008. Në vitin 2011, përfundoi studimet postdiplomike, duke marrë gradën “Master i Regjisë Teatrore” me temën e “Teatrit të Absurdit” dhe shfaqjen “Duke pritur Godonë” të Samuel Beckett.
Në vitin 2015, Myftari u emërua Udhëheqës Artistik i Teatrit Kombëtar të Kosovës, duke drejtuar artistikisht këtë institucion për një mandat të plotë katërvjeçar. Ai ka realizuar mbi 15 produksione teatrore dhe disa shfaqje për fëmijë, duke u dalluar si një regjisor inovativ dhe vizionar.
Regjinë e parë profesionale e realizoi në vitin 2009 në Teatrin Kombëtar të Kosovës. Që atëherë, ka punuar si regjisor i pavarur, duke bashkëpunuar me teatro private dhe shtetërore, brenda dhe jashtë Kosovës. Në vitin 2018, mori pjesë në laboratorin LCT Director’s Lab në New York, një program prestigjioz njëmujor për regjisorë nga e gjithë bota.
Po atë vit, shfaqja “Peer Gynti nga Kosova”, nën regjinë e tij, u prezantua në festivalin “Schöne Aussicht Festival” në Stuttgart, duke hapur rrugën për pjesëmarrjen e tij në festivale të rëndësishme teatrore në Evropë. Agon Myftari vazhdon të kontribuojë si regjisor, duke krijuar produksione bashkëkohore dhe artistikisht të guximshme, që rezonojnë me audiencat në nivel kombëtar dhe ndërkombëtar.
Krahas teatrit Agon Myftari njihet edhe për punën e tij si skenarist dhe satirist në produksione të suksesshme televizive./teve1.info/
