Asociacioni i Gazetarëve të Kosovës ka pritur në takim lamtumirës shefin e OSBE -së në Kosovë, Michael Davenport.
Kryetari i AGK-së, Xhemajl Rexha së bashku me drejtoreshën ekzekutive, Getoarbë Mulliqi kanë falënderuar ambasadorin Davenport për bashkëpunimin dhe mbështetjen e pakursyer dhënë AGK-së dhe komunitetit të gazetarëve.
“Njëherësh, theksuan rëndësinë e vazhdimit të bashkëpunimit ndërmjet organizatave, për avokimin e sigurisë së gazetarëve, fuqizimin e lirisë së medieve në Kosovë, si dhe ngritjen e kapaciteteve të gazetarëve të të gjitha komuniteteve”, thuhet në njoftimin e AGK-së.
Gjatë takimit, AGK-ja i ka ndarë ambasadorit një mirënjohje si falënderim për përkushtimin personal për lirinë e medias.
“Asociacioni i Gazetarëve të Kosovës është mirënjohës për partneritetin e mirë që e gëzon me OSBE-në, që prej themelimit të organizatës në vitin 2002. OSBE ndër vite kë mbështetur aktivitete dhe trajnime të shumta të AGK-së, duke luajtur rol krucial në kthimin e Çmimeve Vjetore në Gazetari, në vitin 2021”, thuhet ndër të tjera./teve1.info/
