Asociacioni i Gazetarëve të Kosovës ka dorëzuar sot para Gjykatës Kushtetuese komentet e saj në lidhje me Ligjin për Komisionin e Pavarur për Media.
Sipas njoftimit të AGK-së, thuhet se AGK-ja argumenton procedurat e ndjekur gjatë ligjbërës dhe nenet që rregullojnë përbërjen dhe funksionimin e komisionit, definicionin për mediat online.
“Ne argumentojmë që procedura e ndjekur gjatë ligjbërës dhe nenet që rregullojnë përbërjen dhe funksionimin e komisionit, definicionin për mediat online dhe këshillin e ankesave janë në kundërshtim me Kushtetutën e Kosovës dhe cenojnë, ndër të tjera, pavarësinë e KPM-së, të drejtën e lirisë së medies dhe parimin e barazisë gjinore”, thuhet në njoftim.
Derisa, AGK-ja i ka propozuar Gjykatës Kushtetuese që këtë ligj t`a shpallë kundërkushtetues.
Sipas AGK-së autoritetet publike nuk kanë treguar vullnet që t`i përgjigjen këtyre thirrjeve.
“Duke respektuar në plotni vendimmarrjen përfundimtare të Gjykatës, ne konsiderojmë që nenet përkatëse duhet të shfuqizohen dhe meqë është e pamundur që ligji i kontestuar të mbijetojë pas shfuqizimit, i propozojmë Gjykatës Kushtetuese që këtë ligj ta shpallë kundërkushtetues. Asociacioni i Gazetarëve të Kosovës ka përcjellë rrugëtimin e këtij ligji nga viti 2021 dhe përkundër thirrjeve të vazhdueshme që ligji të draftohet në harmoni me standardet kushtetuese dhe evropiane, autoritetet publike nuk kanë treguar vullnet që t’i përgjigjen këtyre thirrjeve”, thuhet në njoftim./teve1.info/
