Asociacioni i Gazetarëve të Kosovës (AGK) ka reaguar pas deklaratave të kryetarit të ri të Kuvendit të Kosovës, Dimal Basha, duke shprehur keqardhje për mënyrën se si ai sulmoi mediat në konferencën e tij të parë për shtyp.
Në një konferencë për shtyp, Basha tha:
“Prej 6 vitesh, portalet dhe të ashtuquajtur gazetarë nuk kanë ndaluar së më ofenduari në mënyrat më të ulëta, duke përdorur edhe burime nga gazeta të Beogradit. Mos harroni se keni të njëjtat burime që kanë lobuar për ndarjen e Kosovës dhe për Listën Serbe.”
Në reagimin zyrtar, AGK-ja e dënoi fuqishëm këtë gjuhë që e cilësoi si “të papranueshme dhe shumë të rrezikshme”, duke theksuar se kjo është vazhdimësi e sulmeve dhe akuzave ndaj mediave që Basha ka ushtruar gjatë viteve.
“AGK-ja e fton zotin Basha të kuptojë përgjegjësinë që e bart posti i tij i ri, si një prej udhëheqësve kryesorë të shtetit, dhe të respektojë punën e gazetarëve dhe mediave,” thuhet në komunikatën e Asociacionit.
Gjithashtu, AGK kërkoi nga Basha që në vend të sulmeve të tregojë transparencë dhe t’u përgjigjet mediave për të gjitha pyetjet dhe interesimet që kanë lidhur me aktivitetin e tij para se të bëhej kryetar i Kuvendit.
