Në seancën e sotme, Aleksandar Vlajiq e ka pranuar fajësinë për veprën penale “spiunazh” dhe “armëmbajtje pa leje”.
Vlajiq, agjent i BIA-s serbe, ka lidhur marrëveshje për pranim të fajësisë me Prokurorinë Speciale.
Prokurori, Bekim Kodraliu deklaroi se pranimi i fajësisë së Vlajiq është bërë në mënyrë vullnetare.
“I pandehuri ka pranuar fajësinë për dy veprat në aktakuzë, për spiunazh dhe armëmbajtje pa leje. Pranimi i fajësisë së Vlajiq është bërë në mënyrë vullnetare. Kemi arritur edhe pëlqimin për dënimin për të dy veprat penale”, tha ai, raporton Tëvë1.
Prokurori Kodradliu kërkoi që Vlajiq t’i shqiptohet dënim me burgim rreth 5 vite për spiunazh, ndërsa për armëmbajtje pa leje rreth gjashtë muajsh.
“Duke iu përmbajtur marrëveshjes për pranimin e fajësisë mes palëve, rekomandimi për dënimin për veprën penale spiunazhi, të pandehurit Vlajiq, t’i shqiptohet dënim me burgim efektiv në kohëzgjatje 4 vite e gjashtë muaj deri në 5 vite. Kurse për veprën penale armëmbajtje pa leje, të pandehurit Vlajiq, t’i shqiptohet me burgim prej gjashtë muajsh, me mundësi zëvendësimi me gjobë, në shumën prej 1 mijë euro. Kërkojmë që t’i shqiptoni një dënim unik brenda dënimeve të rekomanduara”, deklaroi ai.
Ndërkohë, avokati i të pandehurit, Ljubomir Pantiq, tha se marrëveshja është arritur me pjesëmarrjen e kryeprokurorit të Prokurorisë Speciale.
“Kemi pasur takim preliminar për pranimin e fajësisë kemi bërë negociata për arritjen e marrëveshjes dhe në fund është arritur marrëveshja për pranimin e fajësisë. Kjo marrëveshje është arritur me pjesëmarrjen e kryeprokurorit të prokurorisë speciale”, tha ai në seancën fillestare.
Vlajiq ishte arrestuar në qershorin e 2024-s, me dyshimin se kishte mbledhur dhe dërguar informacione te Agjencia e Inteligjencës dhe Sigurisë së Republikës së Serbisë.
Avokati i Vlajiq tha se i pandehuri në rastin e lidhjes së marrëveshjes ka treguar pendim dhe keqardhje për veprën penale.
“Ka premtuar që në të ardhmen, nuk do të kryejë vepra penale”, deklaroi avokati i tij. /teve1.info/
