Ish-kryetari i Komunës së Podujevës dhe ish-ministëri i Brendshëm, Agim Veliu ka shprehur publikisht dëshirën për të marrë pjesë në zgjedhjet e 28 dhjetorit, duke u angazhuar në përfaqësimin e Lidhjes Demokratike të Kosovës.
Në një postim në Facebook, Veliu ka falënderuar të gjithë ata që e kanë mbështetur dhe kanë ngritur zërin për kontributin e tij në forcimin e partisë dhe kthimin e meritokracisë brenda saj.
“Kam dëshirë të marr pjesë në zgjedhjet e 28 dhjetorit, jo si një privilegj personal, por si një përgjegjësi ndaj LDK-së, qytetarëve dhe historisë së partisë tonë,” theksoi ai.
Veliu nënvizoi se përfshirja në listën zgjedhore për të është një angazhim i vazhdueshëm dhe një respekt për ata që e kanë mbajtur gjallë këtë parti për më shumë se 30 vjet, duke e ndihmuar atë të mbetet një forcë politike që ka kontribuar në ndërtimin e shtetit të Kosovës.
Ai përmendi, se pavarësisht disa debatëve të ditëve të fundit, mbetet i përkushtuar ndaj vlerave të LDK-së dhe do të vazhdojë të kontribuojë me gjithë forcën për të pasur një të ardhme më të mirë për qytetarët e Kosovës.
Për Veliun, ky angazhim është gjithashtu një akt i respektit ndaj themeluesve të LDK-së, të cilët e kanë udhëhequr këtë parti në momentet më të vështira të saj.
“LDK është shtëpia jonë e përbashkët, e ndërtuar me mund, sakrificë dhe besnikëri. Pjesëmarrja ime është një angazhim për të ruajtur dhe zhvilluar këto vlera, jo për një privilegj personal. Zoti e bekoftë LDK-në! Zoti e bekoftë Rugovën! Zoti e bekoftë Kosovën!”, përfundoi Veliu./teve1.info/
