Deklarata e Amir Rrahmanit se gazetarët e sportit në Kosovë punojnë me “copy-paste” nxiti reagime të shumta tek ky komunitet duke e cilësuar atë si të ngutshme dhe shumë të pa vend.
Për këtë çështje, ka folur edhe Kryetari i Federatës së Futbollit të Kosovës, Agim Ademi. Ai për KosovaPress, ka thënë se deklarata e kapitenit të Kosovës është nxjerrë nga konteksti dhe është keqkuptuar.
“Amir Rrahmani është një super djalë dhe është një futbollist tashmë i dëshmuar. Ka mundur të flasë, ku ta di në çfarë kontesti e keni marrë sepse nuk besoj që Amir Rrahmani është ndarë keq me ndonjë prej gazetarëve personalisht. Pse dikush ka agjenda dhe mundohet ta ‘fus fellutave’ nëpër gjërat të tjera është diçka tjetër. Askush nuk është perfekt, por ata janë të vërtetë, nëse janë të vërtetë, konsideroni ashtu si të vërtetë dhe i doni ashtu si të vërtetë…Nuk mundemi veten ta ngrisim me dikë tjetër, me famën e tij, me pasurinë e tij, me shoqërimin me të, por ne duhet të kënaqemi me ta…Nuk kemi nevojë të merremi edhe me ndonjë gafë të momentit nëse e bën dikush, e ka nxjerr keq prej konteksti kush e ka nxjerrë. Amir Rrahmani është djalë i mençur i cili nuk besoj që e ka karakterin e tillë që dikë e urren, kështu që është bërë shumë bujë e madhe që ndoshta nuk është pjesë për ta komentuar unë”, theksoi Ademi.
Për më tepër, pas kritikave që mori, Rrahmani ka reaguar edhe në rrjetet sociale duke postuar në Instagram një fotografi përmes së cilës tregonte se festa e titullit të kampionit të Napolit në Itali ishte përcjellë live nga 70 milionë njerëz dhe se aty ai e kishte mbajtur flamurin e Kosovës.
