Kryetari i Partisë së Drejtësisë, Ferid Agani, ka deklaruar se ende nuk është diskutuar nëse ai do të jetë pjesë e 10-shes së parë të kandidatëve për deputetë të Lidhjes Demokratike të Kosovës.
Në emisionin “Këndi i Debatit”, Agani ka theksuar se një vend në listë do të ishte shenjë mirënjohjeje ndaj partisë së tij.
“Ne nuk i kemi definuar ende këto detaje; nesër do të diskutojmë. Për mendimin tim, do të ishte shenjë respekti ndaj subjektit politik të cilin e udhëheq, meqenëse iu ka bërë ftesa Partisë së Drejtësisë dhe unë do ta kisha pritur një gjë të tillë” ka thënë ai.
Agani ka nënvizuar se marrëveshja politike me LDK-në për garim të përbashkët në zgjedhjet parlamentare të 28 dhjetorit nuk është një reagim i menjëhershëm politik, pas shpërbërjes së Koalicionit për Familjen, por një proces politik që ka nisur një vit më parë.
Ai ka shtuar se bashkëpunimi mes tyre ka për qëllim të avancojë rezultatet e partisë në zgjedhje dhe të sjellë ndryshime substanciale në rezultatet e saj.
Kryetari i PD-së gjithashtu ka vënë në dukje rëndësinë e programit të përbashkët për reformën e shëndetësisë dhe sigurime shëndetësore për qytetarët, duke e paraqitur atë si një avantazh kryesor për votuesit.
“Ajo që është me rëndësi është se ky vizion politik nuk është një reagim i menjëhershëm pas shpërbërjes së Koalicionit për Familjen, por një proces politik që ka nisur një vit më parë. Aktualisht po ndalon përkohësisht për shkak të zhvillimeve në vend, por do të vazhdojë me qëllim arritjen e fitoreve në këto zgjedhje dhe përmirësimin substancial të rezultateve të LDK-së. Një vend i parë në listë do të nënkuptonte dyfishim të votave dhe është një ambicie e mundshme, nëse qytetarët e kuptojnë se programi i LDK-së, ku merr pjesë edhe Partia e Drejtësisë, ofron reformat më të mira për shëndetësinë dhe garanton sigurime shëndetësore për qytetarët,” ka theksuar ai./teve1.info/
