Gjykata e Apelit e ka refuzuar si të pabazuar ankesën e Prokurorisë Speciale të Republikës së Kosovës, ndërsa ka vërtetuar aktgjykimin lirues ndaj Ferid Aganit dhe Gani Shabanit të Gjykatës Themelore në Prishtinë, për rastin e njohur si “Stenta 1”.
E lidhur me këtë, vetë kryetari i Partisë së Drejtësisë, Ferid Agani, tha se pasojat më të mëdha gjatë këtij procesi kanë qenë në rrafshin e reformës të sistemit shëndetësor, derisa shtoi që i tërë procesi ka qenë e mundur të përfundojë brenda 3 muajve.
“Imazhi im nuk është dëmtuar tek njerëzit të cilët më kanë njohur. Por, ka pasur pasoja të mëdha në aspektin politik. Natyrisht, pasojat më të mëdha gjatë këtij procesi kanë qenë në rrafshin e reformës të sistemit shëndetësor. Absolut nuk ka pasur asnjë bazë, i gjithë procesi ka mundur të përfundojë brenda 3 muajve. Se kush ka pasur interes nuk dua të supozoj. Por, e di që viktima më e madhe e gjithë këtij procesi, ka qenë qytetari i vendit i cili është privuar nga e drejta e një reforme të mirëfilltë”, deklaroi Agani në emisionin “InfoNata”.
I pyetur se sa e ka dëmtuar politikisht ky rast, Agani potencoi që si pasojë e kësaj nuk ka kandiduar në tre parë zgjedhje.
“Siç thotë populli “nuk kam pasur fytyrë të dalë para votuesve të mijë të kërkoj votën, e njëkohësisht të jem në aktakuzë”, shtoi tutje Agani në Tëvë1.
Më tej, Agani tha se integriteti i tij etik dhe moral nuk e ka lejuar të dalë para votuesve duke kërkuar votë.
“Kjo e ka dëmtuar edhe Partinë e Drejtësisë në masë të madhe”, theksoi ai./teve1.info/.
