Fertilizimi i asistuar mjekësor i njohur edhe si IVF, ka filluar të ofrohet edhe në sektorin publik të shëndetësisë që nga fundi i vitit të kaluar.
E deri më tani janë kryer 167 konsultime dhe 470 pacientë kanë termin të caktuar.
“Në këtë fazë jemi duke bërë seleksionimin e pacientëve për me pa a i plotësojnë kushtet për nënshtrim të procedurës. Suksesi i fertilizimit shprehet statistikisht me fëmijët e lindur gjallë jo me sa gra kanë mbetur shtatzënë se munden plot gra me mbetë shtatzënë por nëse nuk e qojnë shtatzaninë deri në fund ajo nuk çmohet si një sukses”, tha shefi i repartit, Leandrit Bejtullahu.
Shefi i repartit në QKUK tregoi për tëvë 1 se si kryhet kjo procedurë.
“Duhet të bëhet fillimisht stimulimi me i përfitu qelizat prej gruas qelizat mandej në laborator përzihen me qelizat e burrit dhe mandej embrioni i krijum transferohet në trupin e gruas dmth është fjala për një procedurë që varësisht prej mënyrës së stimulimit ka procedura të gjata e të shkurta që munden me shku disa javë”, tha Bejtullahu.
Me njëzet vjet të frytnimit të asistuar mjekësor përvojë pune, specialisti i gjinekologjisë, Afrim Muhaxhiri tha se ofrimi i IVF në sektorin publik është i mirëseardhur.
“Realizimi i këtij projekti është shumë i mirëseardhur për pacientët tanë. Metoda e frytnimit të asistuar mjekësor deri më tani është bërë vetëm në sektorin privat mirëpo kjo është një punë e madhe për këtë legjislacion që ka mbërri me realizu frytnimin e asistuar mjekësor ne Qendrën Klinike Universitare”, tha specialisti i Gjinekologjisë dhe Obstetrikes, Afrim Muhaxhiri.
E ndaj repartit të Interfilitetit të IVF, Muhaxhiri tha se si klinikë private janë të gatshëm për bashkëpunim.
“Jemi të gatshëm që ti ndihmojmë repartit të Fertilizimi të Asituar Mjekësor me të gjitha mundësitë tona profesionale pa kurrfarë interesi në mënyrë që ky projekt të fillojë edhe në sektorin shoqëror me sukses sa më të madh”, tha Muhaxhiri.
Sipas QKUK-së, gjatë muajit shkurt, pritet të fillohet me stimulim të vezoreve tek rastet e para, dhe në fazën tjetër fillojnë aplikimet e para të IVF.
