Drejtori i Institutit Octopus, Agim Musliu, thotë se deklarata e gazetarit serb, Branislav Kërstiq se Afrim Bunjaku ishte viktimë kolaterale është e rreme dhe fyese.
Musliu thotë se ish-rreshteri policor, Afrim Bunjaku, u vra me qëllim në një pritë të planifikuar nga grupi paramilitar i mbështetur nga Serbia.
“Deklarata e gazetarit serb Branislav Krstić se Afrim Bunjaku ishte viktimë kolaterale është e rreme dhe fyese. Bunjaku u vra me qëllim në një pritë të planifikuar mirë nga një grup paramilitar i mbështetur nga Serbia, me synim destabilizimin, goditjen e Policisë së Kosovës dhe avancimin e axhendës politike të Serbisë dhe Listës Serbe”, ka shkruar Musliu në Facebook.
Gazetari serb, Branisllav Kërstiq, deklaroi se sulmi në Banjskë ishte një lloj shfaqjeje dhe se polici Afrim Bunjaku nuk është vrarë.
“Me Banjskën shteti ynë ka përfituar plot sovranitet në veri të vendit. Me Banjskën qeveria jonë e ka përfituar lejen për ta mbushur me 10 mijë policë veriun e vendit. Jam i sigurt qe qeveria jonë nuk ka bërë asnjë lëvizje pa koordinim me disa partnerë ndërkombëtarë, siç është zyra britanike ose gjermane, dhe jam i sigurt që asnjë lëvizje në katër vjetët e kaluara që e ka bërë shteti ynë, s’e ka bërë pa koordinim pa aleatët e vetë”.
“Polici i Kosovës, Afrim Bunjaku, nuk është i vrarë. Është një mënyrë si një dëm kolateral. Askush s’e ka pushkatuar zotëri Bunjakun. Secili polic që ka kryer trajnime vetëm 15 ditë dhe që e ka veshur uniformën, është i informuar nga shefat e vetë që barrikadat janë të minuara”, tha Kërstiq në media.
Kujtojmë se Afrim Bunjaku ishte oficer i Policisë së Kosovës, ai u vra më 24 shtator 2023, kur grupi terrorist sulmoi veriun e Kosovës. Me mbi 20 vjet shërbim, ai u shpall “Hero i Kosovës” për sakrificën në mbrojtje të rendit dhe sovranitetit të shtetit.
