Nga një muaj paraburgim iu është caktuar tre të dyshuarve për serat e kanabisit që iu gjeten ditë më parë në fshatin Vërbicë e Zhegrovicë të Gjilanit.
Sipas Gjykatës Themelore në Gjilan, S., R. A. dhe R. Z. dyshohet se kanë kryer veprën penale të kultivimit të bimës së hashashit ose të kanabisit.
“Me datë 23.08.2025, rreth orës 15:00, në fshatin Vërbicë e Zhegovcit të Komunës së Gjilanit, të pandehurit pa autorizim kanë kultivuar bimën e kanabisit, në atë mënyrë që pasi që zyrtarët policor në Gjilan marrin informacion se në këtë fshat mund të ketë të mbjella bimë narkotike të llojit ‘Kanabis Sativa’ shkojnë tek shtëpia e të pandehurit A. S., me ç’rast me rastin e kontrollit në oborrin e shtëpisë, në brendësi të serave të ndërtuara, gjejnë të kultivuara 496 bimë të këtij lloji, me gjatësi 2 metra, në këtë mënyrë të pandehurit me qëllim të prodhimit të narkotikëve, pa autorizim kanë kultivuar bimën e kanabisit”, thuhet në njoftim të Gjykatës.
Ndërkohë është bërë e ditur se i pandehuri R.A., ka tentuar të ikte, por se është arrestuar nga policia.
“Po ashtu, duke marr parasysh rrethanat se ndaj të pandehurve evidentohen disa raste për vepra tjera penale, rrethanat këto të mjaftueshme për të besuar se nëse të pandehurit lihen në liri të njëjtit mund të përsërisin veprën penale. Andaj, gjyqtari i procedurës paraprake ka vlerësuar se qëndrojnë arsyet ligjore për caktimin e paraburgimit ndaj të pandehurve dhe duke i marr për bazë të gjitha ato që u thanë më lart, masat tjera alternative do të ishin të pamjaftueshme për zhvillimin me sukses të procedurës penale”, thuhet në njoftim. /teve1.info/
