Të hënën Forumi Strategjik i Bledit, mblodhi krerët e rajonit.
E para tyre, presidenti i Këshillit Evropian, Charles Michel, bëri një thirrje.
Ky i fundit tha se viti 2030, të caktohet si afat deri kur Bashkimi Evropian dhe vendet kandidate për anëtarësim të jenë të gatshme për zgjerim.
E një ditë më pas, kryeministri i Kosovës, Albin Kurti, tha se kjo ka rritur optimizmin në Kosovë.
Albin Kurti, kryeministër i Kosovës
“Është një gjë shumë premtuese dhe besoj që do ta rrisë optimizmin në Republikën e Kosovës për integrim Evropian. Shumica dërrmuese e popullit duan që Kosova të jetë anëtare e Bashkimit Evropian. Pra ne duam të kemi më shumë mbështetje financiare nga BE-ja dhe sigurisht kemi një horizont në të cilin do t’i bashkohemi Bashkimit Evropian, jo vetëm për të përfituar por edhe për të kontribuar”, ka thënë Kurti.
E njohësit e çështjeve politike, thonë se ky afat kohor është më seriozi i dhënë nga Bashkimi Evropian.
Por, shtojnë se i gjithë problemi qëndron tek shteti serb.
“Unë mendoj që është kohë ideale për të gjitha shtetet, sidomos këto në Ballkanin Përendimor me i zgjidh problemet bilaterale, në mënyrë që nëse dëshirojnë të anëtarsohemi në BE. Por, unë mendoj që problemi është të Serbia dhe se BE dhe SHBA duhet të punojnë më seriozisht me shtetin serb për të kuptuar a është e gatshme Serbia ta bëj hapin historik për t’iu bashkuar familjes evropiane”, ka vlerësuar Raci.
Por, për t’u arritur ky afat brenda 7 viteve po vlerësohet qe Bashkimi Evropian duhet të ndryshojë qasjen ndaj Serbisë.
“Është një mesazh për rajonin dhe vije në kontekstin e luftës në Ukrainë dhe kemi parë që ka interes nga BE dhe Perëndimi që të punohen në zgjidhjen e çështjeve brenda rajonit të Ballkanit Përendimor në mënyrë që të mos ketë konflikt, mirëpo qasja akomoduese ndaj Serbisë vetëm po e trimëron atë që të nxitë jostabilitet, prandaj për tu arritur ky afat kohor duhet të ketë një ndryshim të qasjes ndaj Serbisë që të ketë përkushtim të mirëfilltë ndaj normalizimit dhe zgjidhjeve të konflikteve”, ka deklaruar profesori universitar, Seb Bytyqi.
Njohësit e çështjeve politike në vend, thonë se mosmbajtja premtimeve nga ana e BE-së, po ndikon në ngritjen e tensioneve në vendet e Ballkanit.
