Kandidati fitues për kryetar të Komunës së Drenasit, Ramiz Lladrovci, është surprizuar në Suedi me një tortë simbolike, në mbrëmjen kur Kosova shënoi fitore në futboll.
Lajmin e ka bërë të ditur vetë Lladrovci përmes një postimi në rrjete sociale, ku ka ndarë edhe fotografi nga momenti i veçantë.
“Befasi e këndshme në Suedi nga Agimi dhe anëtarët e FFK-së me ëmbëlsirën kushtuar fitores tonë në zemrën e Kosovës”, ka shkruar ai.
Në postimin e tij, Lladrovci ka falënderuar të gjithë për mbështetjen, duke e cilësuar fitoren në Drenas si fitore të qytetarëve kampionë, të përkushtuar e me integritet.
“Fitorja bashkë me qytetarët kampionë është fitore motivuese, fitore që e meriton i drejti dhe i përkushtuari. Gjuha e kampionit është gjuha e futbollistëve tanë dhe e stafit”, ka shtuar ai.
Ky gjest simbolik u cilësua si një moment gëzimi të dyfishtë, që bashkoi sportin dhe politikën në një atmosferë festive shqiptare në Suedi.
