Kryetari i Federatës së Futbollit të Kosovës, Agim Ademi, ka reaguar përmes një postimi për shfaqjen e flamujve anti-Kosovë nga tifozët e Sparta Pragës.
Pjesë e ekipit çek janë dy reprezentuesit e Kosovës, Ermal Krasniqi e Albion Rrahmani, si dhe dy reprezentuesit e Shqipërisë, Qazim Laçi e Indrit Tuci.
Tifozët e Spartës të shtunën shfaqën flamuj të shumtë serbë mbi hartën e Kosovës.
“Shpreh shqetësimin e thellë për incidentin e fundit në kampionatin çek, i cili prek dhe sfidon identitetin tonë shtetëror dhe është fyes ndaj futbollistëve tanë. Ky veprim është i papranueshëm dhe nuk përkon me frymën e respektit dhe miqësisë që futbolli duhet të promovojë. Ne besojmë dhe e promovojmë futbollin si një platformë për bashkëjetesë dhe mirëkuptim mes popujve. Prandaj, kërkojmë që çdo provokim i tillë të shmanget në frymën e këtyre vlerave, në mënyrë që futbolli të mbetet shembull i unitetit dhe respektit, pavarësisht dallimeve”, ka shkruar Ademi.
Gjithashtu, Ademi u ka bërë thirrje lojtarëve të Kosovës që mos të bien në provokime, duke kërkuar prej tyre që të vazhdojnë të mbeten të përkushtuar dhe profesionistë.
Kreu i FFK-së, ka kërkuar që futbollistët shqiptarë në Çeki të mbrohen, ndërsa ka paralajmëruar edhe ankesë në UEFA.
