Kandidati për deputet nga radhët e Aleancës për Ardhmërinë e Kosovës, Mensut Ademi ka thënë se deklarimet e kryeministrit Kurti se mund të ketë sulme në veri para ose pas Vitit të Ri , janë rezultat i panikut ose mosdijes së tij.
Ai ka thënë se me deklarata të tilla, kryeministri po frikëson qytetarët dhe investitorët e huaj.
“Versioni i parë është mosdija e kryeministrit apo prej mosimplementimit të strategjisë si masa preventive ndaj këtyre grupve kriminale dhe version i dytë, paniku, sepse jemi para fushatës zgjedhore. Nëse bëhet për fushatë zgjedhore është gabim i madh, frikëson qytetarët e Kosovës, investitorët”, ka thënë ai në emisionin “InfoNata” në Tëvë1.
Ademi ka thënë se në se Kurti ka informacione për sulme duhet të shpallë gjendje të jashtëzakonshme dhe siç ka thënë ai të mobilizohen të gjithë.
Të mërkurën kryeministri Kurti duke folur për sulmet në veri, ka thënë se grupet terroriste të Serbisë po përgatiten për sulme në veri të vendit.
