Qeveria Kurti II “gufon” me ide korruptive e njerëz korruptivë. Kështu deklaroi zëdhënësi i Partisë Demokratike të Kosovës, Faton Abdullahu.
E këtë deklaratë, Abdullahu e arsyetoi duke thënë se deri tani Vetëvendosje nuk ka përmbushur asgjë nga ato çka ka premtuar para se të vinte në pushtet, përcjell teve1.info.
“PDK është shumë aktive dhe do të vazhdojmë të jemi më aktivë. Kjo qeveri kur vihet me të kaluarën e saj, armikun më të madh e ka të kaluarën e vet. Kjo qeveri gufon me ide korruptive dhe me njerëz korruptivë tash. I quaj ide korruptive sepse në një fazë të caktuar të zhvillimit të shoqërisë tonë, ato ide janë përqafuar, janë dukur të arsyeshme, janë fituar votat me to dhe pastaj kanë marrë pushtetin. E tani po e bëjnë të kundërtën. Puna jonë është që t’i demaskojmë dhe t’i tregojmë qytetarëve se “këqyrni se çka kanë thënë, e këqyrni çfarë po bëjnë tash”, deklaroi Abdullahu në emisionin “Këndi i Debatit” në Tëvë1.
Madje, Abdullahu pretendoi se PDK si model qeverisje, e ka dëshmuar që është më e mira në të gjitha komunat./teve1.info/.
