Kandidati i LDK-së për kryeministër, Lumir Abdixhiku është zotuar se vizitën e parë si kryeministër do ta bëj në Shtetet e Bashkuara të Amerikës.
Abdixhiku ka thënë se kërkesa e parë e tij atje do të jetë që Kampi Bondsteel të bëhet i përhershëm.
Këtë zotim ai e ka bërë të martën në tubimin e Lidhjes Demokratike të Kosovës në palestrën sportive ‘Jeton Terrstena TOTA” në Vushtrri.
“Palestra Sportive ‘Jeton Terrstena TOTA’ ishte e mbushur sonte si asnjëherë më parë! Mes mijëra mbështetësve nga Vushtrria, rigjetëm gjithë entuziazmin e munguar në kohë. U zotova, në këtë përvjetor të Rugovës, se në Qeverinë tonë të ardhshme, relacionet tona me ShBA-të, si përherë, do të jenë të shkëlqyeshme, të pathyeshme dhe të pazëvendësueshme! Po ashtu zotohem se vizitën e parë si kryeministër do ta bëj në Amerikë, dhe kërkesa e parë do të jetë Kampi Bondsteel të bëhet i përhershëm. “Kosova shtet i pavarur e sovran, i anëtarësuar në NATO e Bashkim Evropian, e me miqësi të përhershme me ShBA-të” – ishte misioni ynë dje, është misioni ynë sot dhe do të jetë misioni ynë nesër. Dhe siç na ka mësuar shqiptari më i madh i të gjitha kohërave, Ibrahim Rugova “Shtëpia nuk mbahet pa miq”, nga këtu ju them Zoti lartë, Amerika në tokë. Në tokën tonë, në Republikën tonë. Koha jonë po vjen, ndryshimi është afër! Xhafë, Rreze e Bashkim, ju lumtë e suksese”, ka deklaruar ai.
