Kryetari i LDK-së, Lumir Abdixhiku, e kritikoi kryeministrin e Kosovës, Albin Kurti, se me veprimet e tij ka bërë që siç tha Abdixhiku, Serbia proruse e me banda kriminale në veri të Kosovës të duke më konstruktive në raport me Kosovën në dialogun Kosovë-Serbi, raporton teve1.info
Sipas Abdixhikut, për shkak të politikave populiste të Kurtit, Kosova e ka shpërdoruar një vëmendje e mundësi të rrallë historike duke mos e koordinuar me aleatë asnjë veprim e më pas duke rënë në grackën e kundërshtarëve të Kosovës, dhe sipas tij, duke rrezikuar veriun e vendit.
“Dhe për këtë ne jemi tash e sa muaj me më pak sovranitet në territorin e Kosovës, pa mundësi të organizimit të zgjedhjeve në veri, pa polici prezent atje e pa sisteme shtetëror atje, madje as vendimet tona shtetërore, ato që u bënë shkas i një moskoordinimi të tillë nuk janë më. Afatet e Kurtit u zhbënë brenda marrëveshjeve të mbrëmjeve në Bruksel”, tha Abdixhiku.
Lideri i LDK-së, tha se Kurti i ka paraqitur dy dokumente të ndryshme në të cilat sipas tij është i paqartë dhe kontrovers.
“Nuk mund të pranosh si bazë të mirë diçka që është merre ose leje ose është bazë përfundimtar ose është bazë fillestare. Dhe e dyta, shpërputhja më e madhe është në mes të refuzimit që provon të ia bëjë asociacionit dhe pranimit brenda draftit që na elaboroi e që nuk e kemi parë asnjëri nga ne, të respektimit të marrëveshjeve paraprake. Respektimi i marrëveshjeve paraparë në thelb është pranimi i Asociacionit, për LDK-në ky Asociacion duhet të bëhet sipas interpretimit kushtetues. Dhe ky interpretim kushtetues i heq të gjitha elementet e frikës që mund t’i kemi të gjithë por nuk mund të bësh lojëra politike këtu në Kuvend, të thuash në një anë nuk do ta bëjë asociacion por kam pranuar një marrëveshje merre ose leje që respektimin e të gjitha marrëveshjeve paraprake”, ka thënë ai.
Ai ka shtuar se kryeministri ka para vetës një marrëveshje të ratifikuar në Kuvendin e Kosovës.
“Kryeministri i Kosovës duhet të kuptojë një të vërtetë të vetme, që para vetës ka një marrëveshje të ratifikuar në Kuvendin e Kosovës në vitin 2013, populli i Kosovës, qytetarët e Kosovës nëpërmjet deputetëve të Kuvendit të Kosovës me 84 vota për, 80% të popullit të Kosovës ka marrë një vendim të tillë. Janë dy rrugë që i kemi përpara, një ta zhbëni këtë marrëveshje ndërkombëtare, dy ta implementoni sipas vendimit të Gjykatës Kushtetuese. Të tjerat janë lojëra fjalësh për debate e konsume populsite në vend”, ka shtuar ai.
