Kryetari i Lidhjes Demokratike të Kosovës, Lumir Abdixhiku, ka pritur në takim ambasadorin e ShBA-së, Jeffrey Hovenier, në selinë e partisë.
Abdixhiku ka njoftuar se gjatë takimit kanë diskutuar për zhvillimet e fundit politike në vend dhe se si këto zhvillimet reflektojnë në pozicionin ndërkombëtar të Kosovës.
“Ambasadorin e ShBA-ve, Jeffrey Hovenier e prita në takim në Selinë Qendrore të Lidhjes Demokratike të Kosovës. Diskutuam hapur për zhvillimet e fundit politike në vend dhe se si këto zhvillime reflektojnë jo vetëm në relacionet ndërshtetërore por dhe në pozicionin ndërkombëtar të Kosovës. Në prag të 16 vjetorit të pavarësisë, duhet të kujtojmë se sa të rëndësishme mbesin aleancat tona në rrugëtimin euroatlantik. Bashkërendimi i politikave tona, i shërben avancimit të interesit tonë kombëtar, siç i shërben të ardhmes sonë si një shtet modern, model demokratik e zhvillimor në substancë”, ka shkruar Abdixhiku në Facebook.
Teksa në përmbyllje, kreu i LDK-së, ka shkruar se partia e tij mbetet e përkushtuar me bindje dhe vullnet të plotë politik./teve1.info/.