Kryetari i Lidhjes Demokratike të Kosovës, Lumir Abdixhiku, është takuar me drejtoreshën për Evropë Jugqendrore në Departamentin Amerikan të Shtetit, Collen Hylnad.
Abdixhiku ka bërë të ditur se nga Hyland ka kërkuar që mbështetja e Kosovës të vazhdojë, veçmas në procesin e dialogut Kosovë – Serbi.
“I shpreha gjithë mirënjohjen tonë dhe anëtarësisë sonë, për angazhimin amerikan në proceset e tanishme të Republikës. Në takim i kërkova që kjo mbështetje për Kosovën – për popullin tonë – të vazhdojë, veçmas në procesin e ndjeshëm dialogues me Serbinë, me qëllim të mbrojtjes së interesave tona shtetare, të përcaktuara në Kushtetutë e Deklaratë të Pavarësisë”, ka shkruar ai në Facebook.
Tutje, ai tha se gjatë takimit ka shprehur pikëpamjet dhe brengat e partisë rreth dokumentit të draft-statutit për Asociacionit.
“Drejtoreshës Hyland i shpreha dhe pikëpamjet tona rreth dokumentit të draft-statutit – të pranuar tashmë ndërkombëtarisht nga kjo Qeveri – dhe brengat që kemi mbi përmbajtjen e tij. Kosova ka nevojë për aleatë që njohin historikun tonë; siç dhe duan të ardhmen tonë funksionale, si shtet e si shoqëri. SHBA-të janë të paalternativë në këtë drejtim”, ka shkruar ai mes tjerash./teve1.info/
