Kryetari i LDK-së, Lumir Abdixhiku, ka reaguar lidhur me menaxhimin e energjisë elektrike në Kosovë, duke theksuar se në konferencën e sotme të LDK-së u shpalos skandali i energjisë elektrike që sipas tij, po shkatërron ekonominë e Kosovës.
Abdixhiku theksoi se gjatë pesë viteve të qeverisjes së popullistëve, Kosova ka importuar energji elektrike me vlerë 811 milionë euro, prej të cilave 247 milionë euro vetëm këtë vit.
Ai shtoi se ky një miliard euro që ka shkuar në këtë skemë të errët mund të ishte investuar në zhvillim, shëndetësi, bujqësi dhe paga për mësues e mjekë.
“Kjo nuk është çështje politike e vogël, por një aferë që prek çdo qytetar të Kosovës. LDK po e ngrit këtë çështje me guxim dhe po mbron interesin publik. Kosova meriton dritë, jo errësirën e aferave energjetike”, tha Abdixhiku.
