ë seancën solemne të 28-vjetorit të Epopesë së Ushtrisë Çlirimtare të Kosovës, kryetari i Lidhjes Demokratike të Kosovës (LDK), Lumir Abdixhiku, theksoi se në momentet vendimtare popujt nuk maten me numra apo territore, por me shpirtin dhe gatishmërinë për sakrificë.
Ai foli për sakrificën e komandantit Adem Jashari dhe për rolin e individëve në historinë kombëtare:
“Në ato çaste, popujt nuk maten më me numra, nuk maten as me territore, edhe më pak me forcë luftarake. Ata maten me shpirtin e tyre, me gatishmërinë për të mbrojtur atë që e konsiderojnë të shenjtë, më të shenjtë sesa veten e tyre. Historia kërkon njerëz që e kuptojnë se jeta e tyre nuk u përket më vetëm atyre, por është e destinuar për një fat shumë më të madh kombëtar.”
Abdixhiku theksoi se sakrifica nuk është humbje, por një akt i krijimit:
“Ata lindin si të gjithë të tjerët, jetojnë si të gjithë të tjerët, por në momentin e provës epokale ngrihen mbi frikën dhe instinktin e mbijetesës dhe bëhen bartës të një përgjegjësie më të madhe se jeta e tyre. Sakrifica është akt madhështor dhe filozofi e jetës; përmes saj lind kuptimi më i thellë i një populli për vetveten.”
Ai gjithashtu foli për formimin dhe karakterin e komandantit Adem Jashari:
“Adem Jashari ishte njeri i një vendi të shtypur, i një toke jo të lirë, nga një familje fisnike me kujtesë të trashëguar. Historia nuk ishte diçka e largët për të; ajo ishte e pranishme çdo ditë mes jetës së tij dhe rrëfimeve për qëndresën e brezave të mëparshëm. Mbi këtë prani të vazhdueshme u formua edhe Ademi.”
Abdixhiku nderoi të rënët për liri dhe rikujtoi rëndësinë e sakrificës si themel të krijimit dhe të identitetit kombëtar.
