Kryetari i Lidhjes Demokratike të Kosovës, Lumir Abdixhiku ka thënë se punimet në rrugën A në Prishtinë kanë rinisur, pasi Gjykata Komerciale rrëzoi vendimin siç e quajti ai “skandaloz të gjykatëses familjare”.
Kjo pasi sipas Abdixhikut, vendimi ishte joprofesional dhe ishte shkelje e rëndë.
Sipas tij, popullistët, me gjithë mllefin e urrejtjen që bartin për punën e tjetrit na humbën veçse kohë.
“Shkalla e dytë e Gjykatës Komericiale rrëzoi vendimin skandaloz të gjykatëses familjare. E rrëzoi sepse ishte joprofesional; e rrëzoi sepse ishte shkelje e rëndë. Vendimet e urdhëresave politike s’mund të përfundojnë ndryshe. Popullistët, me gjithë mllefin e urrejtjen që bartin për punën e tjetrit na humbën veçse kohë. Do të duhej të kishin brenga tjera, do të duhej të kishin qëllime të tjera; sepse vendi ka nevoja plot”, tha ai.
“Ne vazhdojmë; ekipit të Kryeqyteti u themi puna e mbarë ju qoftë; e qytetarët e Prishtinës megjithatë nuk do të harrojnë!”, shtoi Abdixhiku.
Gjykata Komerciale, me Aktvendim kishte pezulluar punimet në rrugën A në Prishtinë, pasi kompania “Sallahu” dyshohet të ketë falsifikuar dhe mashtruar në prokurim.
Rrjedhimisht, kompania nuk mund të marrë pjesë dhe as të ekzekutojë kontrata publike./teve1.info./
